बाबा

बाबा मनातल थोडं
आज सांगायचं आहे
बस जरा थोडा वेळ
तुझ्याशी बोलायच आहे

किती कष्ट करशील
हा संसार चालवशील
माझ्या सुखासाठी का
दिनरात राबशील

दोन घटका स्वतःसाठी
कधी न राहशील
माझ्या स्वप्नांना
तुझ्या डोळ्यांत पाहशील

काटकसर करून
मला भरपूर देशील
स्वतः साठी मात्र
काही न घेशील

रात्री उशिरा घरी
सकाळी लवकर जाशील
आपली भेट न होताच
दिवस असेच जातील

बाबा तुझ्या कष्टाचे
स्वप्न पुर्ण होतील
मी जे घडलो
घडविणारा तु होशील

बस जरा बाबा
थोड बोलायचं आहे
- योगेश खजानदार

जीवन

माहितेय मला जीवना
अंती सर्व इथेच राही
मोकळा हात अखेर
मोकळाच राही
जीवन तुझे नाव ते
संपूर्ण होऊनी
अखेर शुन्य राही
जीवन आता बोलते
हळुच ओठात हसते
पुन्हा काय बोलते
ऐक तु मानवा
अंत फक्त तुझाच होई
विचार मात्र तुझेच राही
कमाव असे विचार जे
अंती फक्त तुझेच राही
- योगेश खजानदार

हे धुंद सांज वारे

हे धुंद सांज वारे
बेधुंद आज वाहे
सखे सोबतीस
मनी हुरहुर कारे

मी बोलता अबोल
शब्द तेही व्यर्थ
समजुन हे इशारे
लगबग तुझ ती कारे

मावळतीस सुर्य
लालबुंद जरा तांबुस
वाट पाहतो कुणी
त्याला ही घाई कारे

नको मझ विरह
तुझं ओढ परतीस
वचन हे इथेच
पुन्हा भेटशील कारे
- योगेश खजानदार

नकळत तेव्हा कधी

नकळत तेव्हा कधी
चुक ती झाली होती
प्रेम झाल अचानक
जेव्हा ती लाजली होती

ठरवल होत तेव्हाच
आपल्याला हीच पाहिजे होती
कस विचारू तिला
जेव्हा ती अनोळखी होती

मैत्री पासुन सुरूवात
पुन्हा खास जमली होती
विचारुन टाकतो तिला
जेव्हा ती जवळ होती

मन बोललं थाब जरा
वेळ चुकीची होती
सोबत तिच्या कोणीतरी
जेव्हा ती येत होती

खुप काही विचारलं
माझ्याशी ती बोलत होती
मी मात्र हरवुन गेलो
जेव्हा ती समोर होती

मन तुटल प्रेम मनातच
आठवणीत ती राहत होती
आपल्या विश्वात रममाण
जेव्हा ती चालली होती

कसे समजावे मनाला
ती जे बोलली होती
मन झाले आनंदी
जेव्हा ती खुश होती

नकळत तेव्हा कधी
चुक ती झाली होती
- योगेश खजानदार

वेड मन

रोज मन बोलत
आज तरी बोलशील
रुसलेल्या तिला
कशी आहेस विचारशील

भांडलो आपण
आता विसर म्हणशील
डोळ्यातील आसवांना
वाट करुन देशील

मन तस वेडसर
आठवणीत राहशील
का भांडलीस माझ्याशी
असा जाब विचारशील

सोड सगळं आता
घट्ट मिठी मारशील
पुन्हा नाही भांडणार
अस वचन देशील

रोज मन बोलत
आज तरी बोलशील
- योगेश खजानदार

साद

सुगंध मातीचा
पुन्हा दरवळु दे
पड रे पावसा
ही माती भिजु दे

शेत सुकली पिक करपली
शेतकरी हताश रे
नकोस करु थट्टा
जीव माझा तुझ्यात रे

वाट पाहुनी तुझी
माती ही रडतेय रे
तुझ्या विरहात
रोज ती मरतेय रे

आता येशील तिला भेटशील
पिकं ही सुखाव रे
ऐकणारे पावसा
आता तरी पड रे
- योगेश खजानदार

मैत्री

तुझी आणि माझी मैत्री
समुद्रातील लाट जणु
प्रत्येक क्षण जगताना
आनंदाने उसळणारी

तुझी आणि माझी मैत्री
ऊन्ह आणि सावली जणु
सतत सोबत असताना
साथ न सोडणारी

तुझी आणि माझी मैत्री
मन आणि भावना जणु
मी न बोलताही
सगळे समजुन घेणारी

तुझी आणि माझी मैत्री
गीत आणि सुर जणु
मधुर शब्दांच्या साथीने
जीवन सुंदर करणारी

- योगेश खजानदार